了得網社會科學_上海話的歲月尋蹤/錢乃榮細說上海話

八仙橋個人，裁剪成衣也是一隻頂。埃面個女人，從小儕會點女紅，辣自家屋裡個縫紉機浪得心應手。埃面個男子，也有勿少是私人裁縫，其中有制作經典成衣告勿斷翻制時髦花式邪氣老鬼個老法師。因為八仙橋從解放前起就有兩家上海**個大布店：老協大祥綢布莊脫仔寶大祥綢布莊，一直開到21世紀初。
搿兩家綢布店我辣五六十年代也進去過，每走到協大祥綢布商店門前，我頭腦裡會勿由得閃過一張照片，想到1956年時協大祥個老板著仔長袍立辣公私合營新店牌前個憨厚笑容；我也會想到70年代初“深挖洞” 辰光見到店裡個幾塊地板撟起來鑽洞機打出來個泥漿流滿一地。不過我進到店裡，放眼看到*多個是老百姓辣將要做新衣裳辰光個從心裡溢出個笑容。綢布個花式看得眼花落花，抬頭看還有拉得老長個鋼絲，營業員拿顧客付款個鈔票告賬單卷起來，擺進鋼絲浪個夾子裡，用力一推，搿個夾子就像弔車一樣，滑到老高個總賬臺浪向去，總臺又拿找好個零鈿告發票推回來。我當時戆想，搿個鋼絲浪大概每夜要用滑石粉搦一揭個哦，覺得老有意思老有創意個。現在是連人儕可以辣纜車裡滑來滑去，自然嘸沒啥稀奇了。八仙橋有介大個兩家綢布店，還有鞋帽店，近朱者赤，難怪搿搭個百姓儕衣冠楚楚了。當改革開放一開場，柳林路浪一記頭開出介許多個攤位，拉開卷簾門，布滿* 新式*受歡迎個衣裙，緊身西褲告黑短褲，還隨時可以量尺寸裁剪做合身衣褲，日日接待全市各處來趕時髦個靚妹俊哥，熱火朝天，自然勿足為奇了。
小樂惠個一大特點，是實實惠惠，稱心如意。小老百姓，勿作痴心妄想，自得其樂。搿種樂惠是實在個好處，實實在在滿足此時彼時個心意。樂惠雖小，其樂陶陶。八仙橋緊連中外聞名個大世界，大世界也是小老百姓歡喜去遊樂個地方。八仙橋因為地處鬧市，除了百貨商店以外，還彙集了勿少特色商品店，如精致個**店、參行、茶葉店、煙行、鐘表店，遠近有名。還有搿個看了勿少越劇滬劇個“大眾劇場”，聽了勿少書個“得意樓”，曾去通宵排隊買電影票個 “嵩山電影院”，有月宮理發店、頂頂好個“老人和 ”本幫菜飯店、糕團店。交關儕是年代久遠積聚下來、充滿市民習俗文化告情調個所在，是各方大眾習慣頻頻光臨而形成個自然街景。一搬動，氣脈就會消失個。就講從解放前就已聞名個兩個大眾浴室——西湖浴室告日新池哦，也是阿拉弄堂告阿拉學堂裡個一點人常去之處，盡管乘車去也要三四站，我屋裡也有幾家人家合用個浴缸，但是我從小就脫弄堂裡向兩個出窠兄弟一道，常莊相約到西湖浴室去汰浴，從小學少年辰光汰到大學長成青年了還去汰，一道汰浴已經成為一種松心遊戲。汰完浴一身輕，還可以躺辣床浪，泡一杯清茶喫喫，或瞇了眼睛咽個小覺，其輕松舒適個感覺難以形容。有一趟過年前，邪氣軋，伊拉居然安排我進了一問特殊個包房裡去，搿個裡向有單獨個浴缸，當時是1958年了，人人去汰浴儕是進大湯再衝洗，搿年強調動員一切設備為人民服務，所以我有這次佳遇，使我看到搿個辰光埃面還保存辣海解放前個搿種一家人可以關起房門一道汰浴個包房，也算開了開眼界。
P12-13

商品搜索

商品分类

【醫學】

【各大出版社】