“宕”出來的“王小毛”
從橫空出世到躍然紙上,從隻聞其聲到見字如面,《滑稽王小毛故事精選》終於跟大家見面了。
“宕”了三四年,“王小毛故事”總算“宕”出來了。
“王小毛”的故事,我從1987年5月開始講,實實足足講了25年,25年裡向總共講了1234隻故事,我的編輯、主持人生涯三分之二以上的辰光搭精力儕是花勒辣迭樁事體上。
《滑稽王小毛》的題材貼近老百姓,反映伊拉甜酸苦辣的生活,表達伊拉喜怒哀樂的情感。大家儕覺得故事裡向的人物賽過天天踫頭,故事裡向的事體像煞日日看到,覺得可親可近。加上《滑稽王小毛》形式生動活潑,語言風趣幽默,嘸沒大話空話套話,老百姓喜聞樂見。
“王小毛”是一個有獨特個性的藝術形像。伊熱情善良、耿直誠實,憨厚中不失聰明,機靈時又寓純樸。伊助人為樂又嫉惡如仇,但“王小毛”也勿是完美無缺的人,伊的缺點搭勿成熟使伊勒辣生活中常常鬧出一眼笑話來。也正因為迭能,聽眾纔覺得“王小毛”有血有肉。
不過勒辣25年裡向,我是用廣播小品的形式來講述王小毛的故事的。勒辣“王小毛”誕生之前是嘸沒廣播小品搿種講法的,不過伊也確實采用了旁白解說、音樂音效迭些廣播劇的常用手法,仔細聽聽伊又跟傳統的廣播劇勿大一樣。老古閑話講“外甥像娘舅”,“王小毛”的面孔像啥人呢?倒是跟舞臺上的滑稽戲、獨腳戲蠻像的,不管劇情鋪排、風格色彩,還是方言運用、招笑手法上,儕跟滑稽戲、獨腳戲有邪氣深厚的血緣關繫。所以有人講《滑稽王小毛》就像袁隆平的雜交水稻一樣,產量高,生命力強。
累,勒辣上海閑話裡向叫“喫力”,也叫“衰瘏”。聽過《滑稽王小毛》的人儕講,聽到滑稽的地方會哈哈大笑,聽到幽默的地方就會心一笑,總之是比較輕松愉悅的。嘸沒一個人會聽“王小毛”聽了喫力煞,衰瘏煞了,不過假使真的讓儂讀劇本,恐怕就不是一件邪氣輕松愉悅的事體了,作興儂會覺得讀起來蠻喫力,蠻衰瘏。因為讀劇本畢竟是從事演劇專業人士的“生活”。
現在我拿劇本改寫成通俗的口語化的故事,搿能一來,估計儂讀“王小毛”就跟聽“王小毛”一樣輕松愉悅了。
不過要讓讀者閱讀王小毛故事的辰光勿覺得喫力、衰瘏,對編著者來講本身就是一樁蠻喫力搭衰瘏的事體,因為劇本寫法是通篇人物對話,隻有少量的旁白解說,而故事卻要以敘述情節為主,人物對話為輔,迭個轉換就是改寫,甚至重寫,蠻喫力、蠻衰瘏。迭個就是“王小毛”“宕”仔長遠的原因之一。
近年來,我也一直勒辣從事上海閑話的保護搭傳承工作,所以搿本故事集也力圖體現出滬語特色,拿“你我他”轉換成“儂吾伊”,盡量保持《滑稽王小毛》的原汁原味,讓讀者一邊閱讀一邊腦子裡就賽過勒辣聽吳儂軟語、方言雜陳的《滑稽王小毛》節目。順帶便也可以起到幫助青年人、小朋友、新上海人學講上海閑話的作用,為保護傳承上海閑話出一份力。想法蠻好,不過真的上手做,倒真的有點喫力、衰瘏。有一位朋友看了我一篇改寫的電子稿,點評講:“喔唷,儂搿本書倒是煩花哎!”我以為朋友是表揚我已經達到《繁花》的水平,我謙虛地講:“過獎過獎,勿敢當。” 啥人曉得迭個朋友講:“儂用上海閑話來寫,既煩又花功夫,是搿個‘煩花’。”哈哈一笑之餘,我並嘸沒改變初衷,我想假使能夠起到體現上海特色搭保護傳承上海閑話的作用,迭點“煩花”,迭點喫力、衰瘏也是值得的。當然迭個也是本書比較“宕”的原因之二。
“宕”的第三個原因,是我有一眼眼忙,雖然早就用勿著每天朝九晚五了,但是作品編創、群文輔導、非遺評審、講座報告、編劇導演、藝術探討、滬語傳承、微信公號等,雜格攏東、投五投六,總歸靜勿下心來,猢猻屁股坐勿定,軋勿出整塊頭的辰光來選稿編稿。
現在常莊有人會對我講:“我是聽著儂的王小毛長大的。”“老底子,我每天儕是一邊做功課,一邊開隻半導體聽王小毛的。”“我現在還常莊拿當年聽過,到現在還記牢的王小毛故事講撥我的小囡聽。”
看到介許多的聽眾、讀者對“王小毛”的喜愛、懷念搭期待,促使我提起精神,克服困難,拿搿本書“宕”出來了。
其實“宕”關“宕”,慢關慢,但是事體一直嘸沒停歇過,反倒是“慢工出細活”了。
迭本故事集精選的60篇“王小毛”故事,基本涵蓋了25年中勒辣“王小毛”身上發生的故事。從1987年的“初到上海”,到反映改革開放題材的“三封電報”;從“王小毛”個人的“初戀風波”,到熱心社區治理的“關鍵一票”;從“王小毛”不諳世事的“車站受騙”,到嫉惡如仇為民除害的“狹路相逢”;從路不拾遺的“公園約會”,到孝敬長輩的“中獎之謎”;從堅持職業操守的“八面來風”,到反腐倡廉的“廉尚往來”等,“王小毛”的故事猶如生活萬花筒,五彩繽紛,主題搭觀念也是與時俱進。
看迭本故事集,不管儂是默讀,還是朗讀,儕建議儂轉換一下閱讀思維模式,用上海閑話來看來讀,會更加有趣!
迭本故事集還邪氣適合作為單位同事、親戚朋友、父母子女之間勒辣休閑、聯歡、旅途、茶餘飯後辰光的講述內容,希望儂看了“王小毛”的故事,拿伊再講撥別人聽,讓儂成為受人歡迎的故事大王。
1200多集《滑稽王小毛》現在隻不過選了60篇,好白相的故事行情行市,說勿盡講勿光,阿拉篤悠悠,慢慢道來。
我相信儂一定勿會嫌鄙搿本“宕”出來的“王小毛”,希望儂歡喜搿個宕法宕法“宕”出來的“王小毛”。
葛明銘
2021年7月2日